وصفة العيش الفينو: خفيف ولذيذ تعمليه بنفسك في البيت

العيش الفينو من انواع العيش الاساسية لعمل السندويشات خصوصا في ايام في الدراسة ، عشان كده بنلاقي كتير من الامهات بيدوروا على طريقة عمله لسهولة توفيره في البيت وضمان نضافته وجودته ، والنهاردة من خلال السطور الجايه هنشارك معاكم طريقة عمل العيش الفينو بطريقة سهلة وخفيفة.

المكونات:

- 4 كوبايات دقيق.

- 2 معلقة كبيرة سكر.

- 1 معلقة كبيرة خميرة فورية.

- ½ معلقة صغيرة ملح.

- 2 معلقة كبيرة زبدة (في درجة حرارة الغرفة).

- 1 كوباية ماية دافية.

- ½ كوباية لبن دافي.

الطريقة:

• تحضير العجينة:

- في طبق اخلطي الدقيق, السكر, الملح, الخميرة.

- ضيفي لهم الزبدة وابدأي بفركها مع المكونات الجافة لحد ما تختفي تماما.

- ضيفي الماية واللبن بالتدريج واعجني لحد ما تحصلي على عجينة ناعمة وطرية.

• التحضير والتخمير:

- غطي العجينة وسيبيها ترتاح في مكان دافي لمدة 1 – 1 ½ ساعة لحد ما حجمها يتضاعف.

- بعد ما العجينة تتخمر ، قسميها لكرات متساوية بحجم متوسط.

• تشكيل الفينو:

- شكلي كل كورة على شكل طويل واسطواني عشان يبقى شبه رغيف الفينو.

- رصي الفينو في صينية مدهونة بشوية زيت او متبطنة بورق زبدة.

• التخمير التاني:

- غطي الصينية وسيبي الفينو يتخمر مرة كمان لمدة 30 دقيقة.

- ممكن كأضافة قبل ما تدخليه الفرن ترشي على الوش سمسم ، بيضيف نكهة لذيذة للعيش الفينو.

• الخبز:

- سخني الفرن على درجة حرارة 200 درجة مئوية.

- اخبزي الفينو لمدة 15 – 20 دقيقة او لحد ما يبقى لونه دهبي.

- وكده يبقى الفينو جاهز للسندويشات.