وصفة التفاح الكريسبي مع الشوفان

التفاح الكريسبي او المقرمش من وصفات الحلويات الخريفية اللذيذة ، اللي بتكون عبارة عن حشوة تفاح متغطية بطبقة من الشوفان المقرمش ، تابعي معانا السطور الجاية واعرفي الطريقة بالخطوات.

وصفة التفاح الكريسبي مع الشوفان:

المكونات:

– 6 حبات تفاح.

– 3 معلقة كبيرة سكر.

– 1 معلقة صغيرة عصير ليمون.

– 1 معلقة صغيرة قرفة مطحونة.

– 1 كوباية شوفان.

– 1 كوباية سكر بني او سكر عادي.

– 1/8 معلقة صغيرة ملح.

– ½ كوباية دقيق.

– ½ كوباية زبدة غير مملحة (تكون باردة).

– ايس كريم فانيليا او كراميل ، او كريم شانتيه (للتقديم).

طريقة التحضير:

1- قشري التفاح وقطعية مكعبات صغيرة او شرايح رفيعة ، حطيهم في طبق كبير وسيبيه على جنب.

2- ضيفي السكر, عصير الليمون, القرفة فوق التفاح واخلطيهم مع بعض كويس لحد ما الخليط يغطي التفاح بالتساوي.

3- وزعي التفاح في صينية فرن مدهونة بالزيت ، صينية بمقاس 8 – 10 بوصة هتكون مناسبة للكمية دي.

4- في طبق كبير اخلطي الشوفان, السكر البني, الملح, الدقيق ، اخلطيهم مع بعض كويس.

5- قطعي الزبدة لمكعبات صغيرة وضيفيها لخليط الشوفان ، استخدمي شوكة او قطاعة معجنات لخلط المكونات لحد ما تتفتت.

6- وزعي خليط الشوفان فوق التفاح بالتساوي.

7- اخبزيه في الفرن على درجة حرارة 190 درجة مئوية لمدة 40 دقيقة تقريبا او لحد ما التفاح يبقى طري ولونه دهبي.

8- قدميه فورا وهو سخن ، مع مغرفة ايس فانيليا او كراميل مع صوص كراميل او دولسي دي لتشي ، او كريم شانتيه.

كيكة شوكولاتة سهلة وسريعة بمكونين اتنين بس