القاهرة - محمد ابراهيم -
يبدو أن بعض نجوم قرروا يثبتوا إن الحياة قصيرة… والزفة أطول، وإن الزواج بالنسبة لهم مش “استقرار” قد ما هو هواية رسمية ورسالة سامية بيتم أدائها على أكمل وجه.
وفي الوقت اللي الشعب بيتخانق على الأسعار، في نجوم تانية بتتخانق على “الدور الجاي في الكوشة”.
وده تقريرنا عن أشهر الرجال اللي اعتبروا تعدد الزوجات مش حق شرعي بس… ده إنجاز شخصي يستحق التكريم السنوي
محمد حسين يعقوب… الرجل الوحيد اللي ممكن يعمل “دوري زوجات محترفات”
الشيخ يعقوب مش بس داعية… ده مشروع مؤسسة زواج متنقلة.
22 زيجة حسب الروايات أغلبهم بنات أقل من 18 سنة، و3 زوجات ثابتين + واحدة “احتياطي” بتتبدل حسب الموسم.
ويسكن الشيخ في فيلا 4 أدوار… كل دور فيه زوجة.
معز مسعود… داعية نصه فن ونصه زواج
معز مسعود يثبت إن الرجل مش لازم يكون لاعب كرة علشان يبقى عنده سجّل انتقالات قوي.
أول مباراة كانت مع ملكة جمال الجامعة الأمريكية…
الثانية مع بسنت نور الدين اللي قالت بعدها: “الحياة مش دايمًا زي ما بنتمنى” وده ملخص مسيرة معز كلها.
ثم دخل مع شيري عادل في “جوازة موسم واحد”، وبعدها حلا شيحة اللي رجعت للحجاب… ثم رجعت عن الرجوع… ثم رجعت للتمثيل.
علي الحجار… الصوت اللي اتجوز 6 مرات ومحافظ على النَفَس
المطرب علي الحجار أثبت أن الأوتار الصوتية مش الحاجه الوحيدة اللي عنده قدرة على الصمود… علاقاته كمان.
6 زيجات ومشيرة إسماعيل من أشهرهم، و7 أبناء بيباركوا له من المدرجات.
أحمد فهمي… كل جوازة أجمل من اللي قبلها
أول تجربة كانت مع شهد رمزي…
وبعدها منة حسين فهمي اللي كانت زوجة شريف رمزي سابقًا يعني الراجل ملتزم بـ إعادة التدوير للحفاظ على البيئة الاجتماعية.
ثم اللقاء الكبير مع هنا الزاهد… اللي انتهى بطلاق ثم تصريح نادر من نوعه:
“كانت عاملالي سحر أسود”.
وده أول طلاق رسمي في الوسط الفني يتم تسجيله ضمن بلاغات الشعوذة.
أحمد سعد… أربع زيجات وطَحال واحد مفقود
أول زواج هادئ
الثاني ريم البارودي أسبوع وخلص…
الثالث سمية الخشاب اللي خرجت من العلاقة بـ “عاهة مستديمة”… بينما خرج سعد بجملة للتاريخ:
“والله ما كنت أعرف إن فيه حاجة اسمها طحال”.
ثم علياء بسيوني… اللي طلّقها ورجع لها… ثم طلقها… ثم رجع لها.
يعني أحمد سعد عامل زواجه على طريقة الاشتراك الشهري… تلغيه وترجعه براحتك.
محمد الحلو… 11 زيجة وآخر واحدة قررت تربّي فيه ضمير
محمد الحلو تزوج 11 مرة… لحد ما وصل لزوجته الأخيرة “نازك الجوهري” اللي قررت تعمل فيه ريستارت اجتماعي ورفعت عليه خلع بعد ما اتهمته إنه “عايز يقلب فلوسها”.
أما هو فرد عليها بطلب “بيت الطاعة”.
ومن يومها قرر:"أنا كده كفاية.. مش داخل علاقات تاني".
وترجع تسأل: ليه كل ده؟
في النهاية ما بين داعية، ومطرب، وفنان، ومؤدٍ صاحب طحال ضائع نكتشف إن الزواج عند بعض النجوم مش علاقة…
ده بيزنس، رحلة، مسلسل، بطولة وأحيانًا عقوبة مشروطة.
ويبقى السؤال التقليدي…
وإنت… لو جاتلك الفرصة؟ هتدخل السباق ولا هتكتفي بالمشاهدة؟
