أحمد جودة - القاهرة - قال الكاتب أحمد عاطف فياض إن مسلسل «كارثة طبيعية»، بطولة محمد سلام، ينتمي لدراما واقعية وليس خيالًا، مشيرًا إلى أن ولادة سيدة لـ5 توائم حدثت كثيرًا في مصر، وهناك حالة مسجلة لولادة 9 توائم. 

وأضاف فياض عبر «فيسبوك»: «إجابات سريعة على أسئلة كتير بتتسأل لي منذ نزول برومو كارثة طبيعية: المسلسل 10 حلقات، هينزل حلقتين كل يوم أربعاء بداية من الأربعاء الجاي بإذن الله على WATCH IT. 

وكارثة طبيعية مش مسلسل خيال علمي ولا حدث خارق للطبيعة.. هو قصة واقعية لزوج وزوجة مصريين عاديين بيمروا فجأة بحدث بيشقلب حياتهم تمامًا، والحدث ده ممكن يحصل لأي حد عادي، وهي إن الزوجة بتحمل في 5 أطفال مرة واحدة كحالة توائم متعددة، ودي حالة حصلت كتير في مصر والعالم كله. 

الرقم القياسي المتسجل في مصر لحالات التوائم المتعددة هي ست جابت 9 أطفال في بطن واحدة، واستضافها عمرو الليثي، واللقاء موجود على اليوتيوب (بس محدش يتفرج عشان مانكسبهوش أرباح)».

فياض يوضح نوع المسلسل ويعلق على «بالطو 2»

وتابع: «نوع المسلسل بلاك كوميدي دراما»، وردًا على سؤال عن مسلسل «بالطو»: «فين بالطو 2؟ مبسوط طبعًا إني بعد سنتين ونص تقريبًا لسة بتسألوني على بالطو 2 في كل مناسبة، بس الحقيقة أنا مش عارف مين قال إن فيه بالطو 2 وبالنسبة لي، قصة دكتور عاطف خلصت، وماكنتش حابب فكرة إني أكتب جزء تاني لمجرد استغلال نجاح الجزء الأول دون ما يكون فيه حاجة معينة عايزين نقولها من المسلسل، وده مكنش رأيي لوحدي، لأ، كان رأي منصة WATCH IT كمان، وكذلك أصدقائي عصام عمر وعمر المهندس كانوا بيفكروا بنفس الطريقة».

ظهور كمال أبورية في «كارثة طبيعية»

وعن ظهور كمال أبورية في المسلسل: «أيوة اللي شوفتوه في البرومو صح.. كمال أبورية معانا في المسلسل، وبقينا أصدقاء جدًا (اعترفت له في أواخر تصوير المسلسل إني أنا اللي اكتشفت مسلسل عزمي وأشجان بتاعه هو وفيفي عبده.. بس ده محتاج له بوست منفصل، هبقى أحكيلكو قال إيه.. خلونا في كارثة طبيعية دلوقتي)».